Friday, December 30, 2011

Krismas 2011 in Karimganj

Hyderabad atangin Karimganj, Assam-ah kumin october thla khan kan insawn a, kan Krismas hman hmasak ber thlalak tlem azawng ka'n dah ange. Kumin hian Upper Republic KTP ten Krismas min rawn hmanpui thei a, sum tamtak leh tha leh zung tamtak sengin programme thatakin an rawn tihlawhtling thei a, kan lawm takmeuh a ni. Krismas ni hian Pathianin ringlo tamtak Biakin ah leh Mission compound ah min rawn hruaikhawmsak thin a, kuminah pawh mi sang tamtak rawn pungkhawmin Pandal lianpui mai Rowlands Memorial High School tualah sain programme siam a ni a. Pathian thusawina vawi-4 vel zai leh lam karlakah neih a ni a, naupang te leh thalai etc. ten hun an nei bawk a. Tin, Biakinah pawh ringlo tamtak malsawmna dilin an tawngtai bawk a ni. An thu ngaihthlak leh an mithmuh zawng zawng te Isua Krista rinna kawnga hruaitu alo nih theihnan i tawngtaipui thin ang u.


Biakin kawtah mipui an pungkhawm

Pandal awmna leh Mission Compound inkar kalkawngah pawh an tam khawp mai

Ni 28-a KJS (kan thalai pawl ang hi) Bible track sem

Bible track sem

Karimganj Mission compound ruaitheh, Ni 26 December

Thursday, December 29, 2011

Krismas 2011@Karimganj


Upper Republic KTP band

Upper Republic KTP special Item

Compound naupang ten Krismas drama an chang mek

Kan nupa in Ranin kan siam ah

Kan nupain Biakin chhungah

Tuesday, June 28, 2011

Chhingmit intawng chu

Rawllai ka ‘d’

Mihring kum chhiarnaah chuan alo rei ve ta hle mai kan tleirawl lai hun te kha. Belpui vala val ve ta na na na chuan duhte kanlo tawng ve a. Ni e, khatih hun lai khan ‘hmangaih’ ka tawng ve a ni. Ka ngaihzawng ti satliah lovin ka ‘d’ tiin ka ko hnap thin a, ka tan khuavel a ti parmawi thin! Kan ‘nih’ tan dan pawh ho te a ni. Vengkhat kan ni a, kan in pawh inhlat lote a ni. A u te nen phei chuan naupan lai atanga inkawm thin kan ni a.

Amah hi kei aia a naupan deuh avangin nau enin ka en thin. Mahse…zan khat chu tuikhurah tui kan chawi a (khatih hun lai khan kan khua hian PHE tui connection kanla nei ve lo), keini tleirawl kha chuan tin khat hi kan kawt zo chiah lova, a chanve aia sang deuhte kan kawt a. Kan tui chawi hawlam chu kan thian hovin hmun pakhatah kan chawl a, kan chawlh atanga rei vaklo ah chuan ka thiani te pawh an tuichawi hawlam an rawn thleng ve a.

Lo chawlve tura kan tih chuan anlo chawl ve mai a. Tlema kawngpui atanga piah deuhvah kan thukhawm laih mai a, amah hi a hma pawha kalo mitmei ruk thin leh ka thiante hnenah pawh ka sawi thin avangin nakinah chuan ka thiante chuan ka rilru hria niawm takin ‘chance’ min pe ta a ni. Tichuan chumi zan atang chuan ‘d’ kalo nei ve ta. Hmangaih lehkha kan inthawn dan leh kan inkar a kip akawi chu sawilo mai ila, mahse sawi hmaih phal miahloh chu Inrinni tlai inbual fai zawh ver vawra ka ‘d ‘te inbula han len kha a ni. Ka hmuhturin pawnah a rawn chhuak ngei thin a, ava nuam thin em!

Tuantul vangin Zawlkhawpuiah

Kan khuaah vanneihthlak takin Matric ka pass a, science subject lak ka duh avangin kan khuaa zirzawmna awm ta silo chu Aizawl khawpui lamah kal a ngai ta. Matric ka pass kan lawm ni a ka ‘d’ hlimzia leh Zawlkhawpui ka pan dawn zana a hmel te chu lei leh van ang hlauh a ni. Mahse kan pahnih atan a that zawk tur zia hrilhfiah chungin inngai tak chungin Aizawl ka pan san ta a. Kan khua hi kala chhuahsan ngai vakloh avangin Aizawlah hmelhriat mumal nei talo chu ka lung a leng thin kher mai. Hun erawh a kal liam duak duak a. Mahse mihring hi alo mak a nih hi, thla tam a liam hmain lehkha kan in thawn tlem tial tial a. Thla riat vel naah chuan ka ‘d’ lehkha hmuh tur a awm tawhlo. Chutiang bawkin keipawh Aizawl ka thlen thlak tirha lehkhathawn ziah ka peih ang a ni ta derlo mai. Ka Hmangaihna a chuai ta em ni?

Lam ang kalo let leh ta

Kumkhat dawn kan khuaa haw lova ka awm hnuah chuan nikhat chu hawna hun remchang ka hmu ta hlauh mai a. Inrinni tlaiah kan khaw Bus-ah ka thuvang mai a, tlai dar 5 velah kan khua him takin Pathian zarah kan thleng a ni. Ka thlen veleh chuan ka thiante ho pawh an rawn leng sap sap a, an thu hriat chak pakhat ka ‘d’ nena kan chanchin min zawt a. Mahse chhan ngaihna vak ka hrelo, lehkha pawh kan inthawn ngai tawhloh thu leh kan ‘nih’ tawh loh thuin ka chhang mai a.

Chawte ka’n eikham a, hemi zan atang hian kan khua naupang Sunday School Inkhawmpui Venglai BiakIna a awm dawn avangin kan thian ho pawh Inkhawm turin kan inau khawm a. Tan hma hretin kan thleng a, BiakIn chhung chu a lokhat vek tawh mai a. Keini chu BiakIn hnung Pulpit chung zawn lama Balcony-ah kan thu a. Mipui ep zawnga kan thut bakah tlar hmasa berah kan thu si a, kan lang chiang kher mai.

Chhingmit a intawng

Inkhawm kan tan a, tan atanga rei vaklo ah chuan hmeichhe thutna lampang tlar laiah chuan ka ‘d’ (hlui) ngei mai thu ka zu hmufuh ta. Ka zuk en a a ni chuan a hma tang khan minlo hmuin minlo en reng tawh ni awm tak a ni ka’n en (melh) ve chuan hmuhnawm min tih hmel tak hian minlo thlir reng mai a. Ka rilru-ah thildang a awm tawh lo, kan tuichawi zana ka hmangaihna kha a lokir lehta niber hian ka hria. Duhthawh taka kan mit leh mit kan han in tawntir chu ka tuiral hi a ni ber mai.

A va nuam em! Ni e, khami ‘hun’ atang khan kan induhna alo pung a, kan inhmangaihna chu ahma aia nasain chhem alhin a lo awm leh ta. Inkhawm kan bang a, ka thiante ho bula kal lovin ka ‘d’ (thar) chu ka zawng nghal vat vat a. Kan han inhmu chu inzah tak chungin kan in chibaia. Chutah chuan ka lenna tur tuma zawh ka ngailo keimahah hian a chiang vek tawh. An inlam panin kan haw dun a, rawn leng rawh a tih hi ka nghak phal tawhlo, ka rawn leng dawn aw tiin ka zawt nghal a. Ani pawhin lawmtakin alo ‘aw’ a, a tawi zawngin sawi ila kan in hmangaihna chu kan ‘rewind’ leh ta a ni.

Lal ISUA nen in chhingmit a intawng ve tawh em?

He thu ka ziah chhan ber chu Lal ISUA nen kan chhingmit hi a intawng ve tawh em? tih hi a ni. Peter-a phatsantu tenawm pawh vawi thum a phat hnua Lal Isua’n a mita a enkalh chuan a tuiral zawih zawih mai. Tirhkoh Paula pawh Lal Isua, a tihduhdah thin eng chuan a chhun thlu a, a thinlung chu a va danglam nasa tehreng em.

Chhiartu duhtak, kan mit leh Lal Isua mit a intawn meuh hi chuan khawiah nge kan kal anga, enge kan tih ang tih hi zawh kanla ngai dawn em ni? Keipawh kalo theihnghilh tawh, mahse chiang tak maia kan chhingmit a intawn avangin ka ‘d’ hlui kha ka ‘d’ thar alo ni leh ta a. An run sang kaiin nauang kan nui za leh theita a ni. Lal Isua nen in intawn hun chuan rinhlelhnain I khat tawh lovang a, Amah ring chungin Amah chu I theihna zawng zawng nen i fak tawh zawk ang.

Wednesday, April 20, 2011

ZAWHNA KA ZAWT ANG CHE



Zawhna ka zawt ang che. Uluk takin ngaihtuah la min chhang dawn nia. Chhanna rintlak ka beisei a ni, chumi atan chuan i ngaihtuahna fimtak kha hmang ang che. I thiante leh i nupui leh i pasalte ngaihdan leh an pawmdan ka beisei lova, nangma thinlung chhungril atanga chhuak chhanna a ni ka duh ni. Rev Liangkhaia khan a rilru chhungrilah he zawhna hi a pai reng thin a ni ang hlathu hmingin a lo ziak chhuak a. Vawiinah hian he thu hi min zawt nawn a ni.

Ka zawhna chu hei hi - Engtinnge Pathian Fa mal chu misual ka tan alo thih?
Zingni chhuak engmawi leh boruak thianghlim min pek zozai avanga kuna chibai buk reng tur kan nih piahlamah Ama Fapa meuh ui hauh lova thihna kutvawt tuar tura chhantu neilova a tualthih dan hi thumak tak a va ni em!

Lunghriam hnam hunlai atangin mihringte hian thir (metal)-a siam hmanrua hmanna chang kanlo hria a, kan nundan pawhin hma a sawn chak hle mai. Tunhmaa kan chhehvela thil awm mai mai thin te chu awmze nei zawkin an awm a ni tih kan lo hre mek zel bawk a. Thil reng reng hi amah maia awm lovin siamtu emaw awmtirtu emaw an awm ngei niin mi tamtakin an ring a, chik tak leh dilchhut takin chung thilte chu an chhui a, an hriatthiamloh leh an hriat loh te hriatbelh an tum a. Chu chuan zawhna tamtak a rawn hring chhuak a ni. Hriatthiam ngailoh leh a ngaihna an hriatloh zawhna an han zawh changa dik taka chhangtu te chu ‘mifing’ tiin mi ngaihsan an hlawh a. Khua leh tuiah pawh dinhmun tha changin khawtlang mimir zahkai anlo ni thin.

Lui leh tuifinriata inkal pawh nan hmasang atangin Lawngleng an lo siam chhuak a. Tangkai taka hman mai anla duhtawk lo cheu! Zawhna lo awm ta chu engvanga lawngleng hi tuia lang thei nge a ni tih hi? He zawhna khirhkhan tak mai hi Archimedes-a chuan Archimedes principle buoyancy hmangin zawhna te alo chhang tawh a. Hriatna alo pung a, theihna a lo sang zel bawk. Engatinge van lamah thil kan vawr a leilamah kher alo tlak thlak, phei zawngte emaw a nihloh leh van lamah awm reng mai awm. Mahse Isaac Newton-a chuan law of universal gravitation hmangin he zawhna hi alo chhang tawh bawk a ni.

Thiamna alo san zel avangin mihringte hian hriatloh neih kan duh lova, chhan theihloh zawhna a awm tur a nilo tiin sum leh pai leh tha tamtak sengin chung thuruk inthup te zawngin kan hmanhlel a ni. Khawvel pawh a zau sawt e! Kan Lal Isua hunlaia khawvel chu Rom empire leh a chhehvel chauh a ni a. Tlawhpawhloh ram te daidar turin Christopher Columbus-a te, Vasco da Gama te an hmanhlel a khawvel pawh a zau sawt e. Vansang lamah lah thla leh arsi te chu kan inpui a lo ni ta. Thlaa lawn te kan intihhmuh a, van thengrenga zin te chu infiamna hautak takah alo chang ta bawk a. Hmuhhmaih a awmloh nan leh chhantheihloh zawhna awmlo turin kan khawlthaber leh operator thaber kan hmang a. Second reilo te thil lo lang zawk pawh lo hrechiang a lo hrilhfiah nghal zung zung thei turin kan hmanhlel a ni.

Thiamna in tawp chin a neih miau loh a vangin mi thenkhatin kan hna zawng zawng chanve min thawhsak theitu an tih mai ‘computer’ te pawhin kan inchhung lum a rawn rap ve a. Google hmangin kan hriatloh kan hria a, FB in kan hmuhloh min hmuhtir bawk. Khawvelah hian chhantheihloh zawhna zawhtur a awm tawhlo a ni ber mai.
Enga tinge ? Eng vanginnge ? Eng aiah maw ? Khawvel leh a chhunga thil awm zawng zawng siamtu in hreawmna sawi hleih theihloh tuar tura Ama Fapa A rawn tirh mai le ? Khawvel finna hian chhang thei dawn ni ila kum sanghnih a chuang tawh, chhang thei sela chu kan khawvel mifing te pawhin an chhang tawh tur a ni. Mahse he thuruk hi khawvel finna atanga chhan chi a ni lo.

Nie, Amah anga A siam, a duat, chanvo tha engkim a pek, mahse A thuawih leh silote tan heti em em a A thilphalna hi mihring tawnga sawifiah mai theih a nilo reng a ni. Lehkhabua ziak zawhsen a nilova, mihring dam chhung kum 100 chhung hian sawi zawh hman pawh a ni love.

Rev Liangkhaia chuan hei hi a hrechiang a ‘thumak ka sawinin theihloh chu Kalvari chanchin a ni’ a ti tawp mai. Ka LALPA sualna neilo misualte zinga an khaikan ve mai nachhan hi thumak tak chu a ni. He ‘thumak’ hi ‘PATHIAN HMANGAIHNA’ a ni a, chu chu Amah ringtute apiangin an hrethiam a, he zawhna hi an ‘nunin’ an chhanglet thin a ni.

Tuesday, April 5, 2011

1906 Mairang Harhna leh Mizoram


Ni 4 April (Thawhtanni) kha Mizoram-a harhna lothlen champha a ni a. Mizoram harhna lothlen dan ngaihnawm tak Rev SR Lalkailuaia ziak hi lo chhiar ang u.

Kan rama Kristianna rawnluh tirh lai vel a Pu Zosaphluia te, Pu Zosapthara te leh Pu Buanga ten Wales ram leh Khasi ramah harhna a thleng tih an hriat khan Mizoram-a thleng ve turin an duh em em mai a. A lothlen ve theih ngeina tur a nih beiseiin March 15-18, 1906-a Mairang-a Khasi Assembly awm chhim turin Chawnga, Khuma, Thanga, Vanchhunga, Pawngi, Thankungi, Siniboni (Khasi) leh chhimlam atangin Thankunga, Pasina leh Zathanga te sawmin Zosapte hian an hruai a.

Sairang atangin an chhuak a, Syhlet-ah Pathianni an cham a. A tukah Theiria-ah riakin a tuk lehah Cherrapunji veng pakhat, Nongsolia-ah an riak a. An thlen inah chuan zaia kutbeng leh phar duai duai te an hmu a, an hrethiamlova, uan thiltihah an ngai a mak an ti hle a ni. A tuka an han kal leh chu kawtchhuahah Khasi ho Inkhawmpui kal tur harhna chang rui hlim em em mai nen an kal hova. Sohravim khua an thleng a, kawng sira in pakhatah an lo zai a an khur bawk a, an kalpuite chu an lut ve mai a, Mizo te chuan nghah chi niin an hre lova an kal san ta a. Luite pakhat anva thlenga chaw an fak ta a ni. An chawfak lai chuan Khasi-ho chuan an rawn umpha leh a an la khur dur dur hlawm a. Thanga chuan, “Enge maw in hlauhva in khurh in khurh hlawm mai le ?” a tita chawt a. Anni chuan, “ Engmah kan hlau love, PATHIAN in thil ropuitak min tihsak a, kan lawm a kan khur a nih hi” an ti a. Chutah chuan thil awmzia an hreve ta deuhva. An kal zel a, Mawhphlang khua an thleng a, an riak ta a.

Mawphlang khuaah chuan zanah hlim takin an Inkhawm a, a tukah chuan Mairang khua chu an thlengta a ni. Pu Syney Hama Inah an thleng a. Tlaia tawngtai Inkhawma an kal chuan Sawrkar Officer leh mi ropui taktak inkhawm an hmuh chuan an awt hle a. Sawrkar hnathawk hmasa Suaka, a hnua Durtlang Lal ni tate chu an hrechhuak rum rum a ni. A tuka chawhma Inkhawmah chuan Pulpit bulah an thut ho tir a. Inkhawm chu an zaitui hle mai a. Thanga chuan hnung lamah tap niawm tak thawm a hria a, ahan lehhawi a Khuma chu a tap alo ni a. “Tunah chuan Mizoram-ah harhna a lo thleng ve ta” a ti hial a ni. Tlai lamah tualmei an ainaah an zai laiin Vanchhunga chu a khawng ta tlat mai a a kut te a hum ruh a. An buaipui lai chuan “Aw LALPA, ka rinhlelhna tlang aia lian chu i labo ta a, ka lawm e” tiin a rawn au chhuak a, a khawng chu a reh leh ta a. T umkhat pawh Thanga chu a hit ta mup mai a, tlu mai dawna a inhriatin a insiam fel a,harhna a zem ve deuhin a inhre bawk. Tichuan, Mizo zinga harhna chang hmasa ber chu Khuma a ni a, a dawtah Vanchhunga, a pathumna chu Thanga a ni ang.Inkhawmpui tiak dawn Pathianni tlaiah Mual Inkhawmah a bik takin Mizo lokalte leh Mizoram pumtan harhna dilin tawngtai rual an rawt a, chuta an tawngtai chu an tuiin an thawm a na hle an ti. Mizo-ho pawh athen chu an tap a, an au ve viau a ni. Hlim taka zana an Inkhawm leh hnu chuan Inkhawmpui chu a tiak ta a ni.

Inkhawmpui tukah chuan an hawng ta a. Sohvarim an thlen chuan an kalpuite chuan Thlarauvin kal zel aphal lo tiin an riak ta a. A tuk chawhma pawh chu an la cham a, chawhnuah an chhuak a Cherrapunji khuaah an riak leh ta a. Zanah an Inkhawm a, chutah chuan Pasina a lam ve ta zak zak mai a. Ani hi Mizo zinga harhna avang Thlarauva lam hmasa ber a niin a lang. Cherrapunji an chhuahsan a an thlen In pa chuan an luchungah kut nghatin a tawngtai theuh a. A tawngtaizawh chuan, “Mi pakhat tih chauhlo chu in faikim vek e. In kal a, Thlarau Thianghlimin a kalpui ang che u a. Setanah pawhin a zui dawn che u a ni. Fimkhur hle ula, in fimkhur loh chuan buaina in tawk ang” a ti a, a in chibaia, an kal ta a.

Silchar an lo thlen chuan an inbe duh lo ta tlat hlawma, an tum deuh hmur hlawm mai a. An lo haw zel a,Neihbawi Bangla an lo thlen chuan Thanga chuan an awmdan chu sawifiah turin a ti ta hlawm a, A engamahchu sawi tur an nei hlawm ta lo va. Tichuan, an fimkhurloh vanga anchungah he thil hi thlengah an ngai a, an loharh ta hlawm a, Setana tihbuaina lakah an fihlim tâk avangin an lawm hle a, Pathian hnenah lawmthu sawiin an tawngtai ta a ni.

April 4, 1906 (Nilaini) chawhnu lamah chuanChaltlang-a tuna Bethel lungphunna hmun hi an lo thleng a, an chawl a a mal te tein an tawngtai a. An tawngtai zawh chuan Pu Zathanga chuan, “ A hmasa ber a tawngtai khan Vansangah meialh thlawk ka hmu a, tawngtai apiangin a lo hniam tial tial a a hnuhnungber a tawngtai khan kan zingah alo awm ta a ni ang ka hmu ta hauhlo” a ti a. Thlarau Thianghlimin a luah ta ngeiin an inngai a,zai chung hlirin an kal leh ta a. Tlai dar ruk velah Mission veng an thlenga, an thlen zan atanga Pathianni thlengin thil thar engmah a thleng zui lo.

April 9, 1906 (Thawhtanni)-ah chuan Pu Zosaphluia lopuan tawh angin chhim lam palai hawng tur thlah Inkhawm chu an nei ta a. An han zai chu an zai tawp thei ta hauh lova, an zai ta tluk tluk mai a. Chutah Pi Hlunziki chuan a sual a rawn puang a, tawngtaipui a ngen nghal a chu chuan mipui a thawng lehzual. “ Vandar vaw ring rawh u, vawiinah kan lawm ang, mi pakhatin a sual sim ta” tih hla an sa zui a. Zai nen, sual puan nen, tawngtai nen an ri ta mup mup mai a. Zing lama an Inkhawm kha tlai dar li(4)-ah an bang thei ta chauh a ni.

Hei hi Mizorama harhna nawlpui a lo thlenna bul chua ni. Pu Zosaphluia chuan,“Van atangin Thlarau Thianghlim meialh chu kan zingah a lo thleng ta a ni” a ti a. Reiloteah Mizoram khaw hrang hrang Muthi, Sakawrtuichhun, Maite, Ngopa, Khandaih, saipum, Pawlrang, Bunghmun leh Zokhawsangah te a thleng ve nghal a ni.
He harhna hian Chanchin tha hrila thahnemngaihna thar a tuh a, an kalna leh thawhna apiangah Chanchintha an hril zel a, an sawi mawlh mawlh a ni. A hmaa kumkhatah 10 pawha pung ngai mang lo kha, a za telin kum tin an lo pung ta a ni.

Tin, mirethei leh harsate hnenah chauh ni lovin lal leh milianho zingah pawh ringtu an lo awm ta. Lal, kristian-a inpe hmasate chu Vanchhunga, Kolasib Lal leh Hrangvunga, Bunghmun Lal te an ni. Sawrkar hnathawk hmasa Suaka te pawh Kristian niin mi tangkai tak an ni ta.

He harhna hian Mizoram-ah chi nung a tuh a, 1913,1918, 1930 ah te a runpui lo thleng lehin, tun thlengin harhna hian kan ram hi min awm chilh ta a ni.

Thursday, March 31, 2011

Vision City building thlalak



A dinglama mi khi Multipurpose Hall (Kitchen & Dining Hall) leh Meeting neihna atan kan hmang a, pakhat zawk khi riahna room a ni.



Meeting Hall



Hall office tura kan duan, a bang lehlam siam tawh



Multipurpose Hall Front View



Landscaping ka siam ve a nih khi



Multipurpose Verandah-ah thuthhleng tur an siam mek



Chaw dawhna (pantry) hi duh huna hawn theih turin partition wall a awm



Kitchen chhung



Front View of Multipurpose Hall (A vaia lang thei)



Riahna tur building

Pathian zarah kan building sa pawh kan chhunzawm vel zel e.

Saturday, February 12, 2011

Kala hmangaih reng che asin

Bul tanna

Ni leh thla, kum tam alo liam leh ta reng mai. Ka duh a Ka thlang chhuak a mipui sang tam tak zing atangin. A ni aia tha, mawi leh Keima nihna nena inhmeh hliah hliah zawk tur pawh Ka hmulo a nilo. Mahse engin nge min mawlh le!...Ka hmangaih tlat si. Ka han inpuang law law ange - mite itsik thamin a ni Ka hmangaih ni. Amahah hian Ka tana chhenfakawm vena tur pawh a awmlo mai ni lovin amah avang hian vawi tam tak Ka rum zawk a ni. Hun lo la awm zel tur chatuan chatuan thleng pawhin tiin Ka hmangaihna Ka hlan a,Ka duh em avangin atan kumkhua pawhin Ka rinawm ang tiin Ka in tiam bawk a. He hmangaihna hian hrualhrui angin chat lovin Min phuar bet tlat a ni.

Mahse tangdang zunah maw ilo uai a

Hun leh nite tuilian angin anlo liam zel a. Hlim takin Kan lengdun zel dawn emaw Ka tih laiin phatsanna tenawm tak Ka tawk ta zeuh zeuh mai. Sal ang maia a awmlaia Ka chhanchhuah te, miten mi pangngaia an hmuh ve theihna tur atan a Ka thiltih sak zawng zawng te chu Ka duhtaki chuan hmusitin tangdang minlo belhsan ta a ni. Kei aia amah duat leh ngaihsaktu hmu niawm maiin Ka lam alo hawi duh ta lova. Heng an chanchin zawng zawng te hi hmulo in hrelo thei ni ila chuan Ka chhungril natna tamtak hi a kiam tur a nia le! Lungngaiin Ka rum a ni! Ka hmangaih si a. A sakhming Ka sawi nin theihloh ka atang chuan selna anka pawh Ka tawng ta zeuh zeuh mai le, eng a ti zota ni maw! Ka duat, Ka enchimloh leh a mualpho hlau reng renga Ka tuamhlawm thin chuan Ka hmangaihna chu ngainepin Ka tangah alo bei duh talo.

Ka suangtuahna vakvel

Ka parmawite-i chu ka lam hawiin lo nui leh se tiin ka thlir vawng vawng thin. Amah ngaia ka awmlai min hnem tur an awm si lo. Ka lungdumtu ngei hi inchhirin lo let leh sela, Ka lunglawm a kim tur a nia le! A chang hi chuan Ka lam hlata a awm nasat poh leh Ka hmangaihna hi a zual nite hian Ka hre thin a, amah hmangaihtu diktak hi Min han hrechiang selang chuan Ka hmangaihna chu a van chhanglet nasa dawn em!

PATHIAN HMANGAIHNA ROPUI ZIA

Hosea bu ka chhiar a. He lehkhabu-ah hian PATHIAN hmangaihna nasat zia a lang nasa hle mai. Nu leh pain an fate an hmangaihna nasa ber an pek aia nasa in Pathianin Israel fate hi a hmangaih a ni (Isaiah 49:14, Nimahsela Zion chuan, 'Jehovan mi kalsan a, Lalpan mi theihngilh ta,' a ti a. Hmeichhiain a fapa, a rila rah chu khawngaih lohna turn a nau hnute hne lai chu a theihnghilh thei em ni? Thei e, chungte chuan an theihnghilh a ni thei e, nimahsela kei chuan ka theihnghilh lovang che). Engmah nilo, mite hmusit leh nuihzat Israel fate an saltanna atangin a hruai chhuak a. An tana ram a buatsaih sakah a hruai thleng a. Hmangaihna sawifiah hleihtheih lohvin a hmangaihin a tuamhlawm a. An mualpho a hlau va, an ralte a dopuiin hnehna a pe a. Mahse Pathian hmangaihna chu hnawlin an tet lai atanga anmahni enkawltu leh duat em em tu chu tlan bosanin an uire san a ni. Hmangaihtu rilru chu a rum ngei ang. Mahse hmangaihna a khat leh thutiama rinawm kan Pathian chuan Israel fate chu ala hmangaih a, an uire chung pawhin a la duh a ni tih tihlan nan Hosea chu uire nu Gomeri nupuia nei turin a ti a ni. (Hosea 3:1, Tin, LALPA chuan ka hnenah, Kal leh tala, hmeichhia, midang duhlai, uirenu chu va hmangaih rawh, Israela thlahte chu pathian dang hnen lam hawiin grep chhang ngaina mahse, LALPAN a hmangaih reng ang bawk hian, a ti a). Chumai ni lovin kan Pathian chuan a duhsak ngaiin la duhsak rengin a lainatna chu a la lantir reng a ni tih a hriattir bawk a. (Hosea 2:23, Tin, ani chu katan leiah ka ching ang a; Lainatdawnglovi chu ka lainat ang a, Kaminilova chu, "Ka mi i ni," ka ti ang a, Tin, anin, "Ka Pathian i ni," a ti ang).

Kei ka tan a hlu

A ang chhung ata vawi tamtak tlan bo thin, malsawmna nasa taka min vur chung pawh a lawmthusawi ngailo chung pawh a malsawmna a min vur reng te hi khawngaihna vang a ni. A man ngaihtuah hauh lova hmangaihna hi min duhsakna vang a ni. Ka khawlohna avanga hrem tur chhush zalen ka ni hi Chhandamna chu a ni. Mahni nunna pawh inhlan ral thak ngam hi hmangaihna thlawn a ni. Misualte A bula min awmtir phal ve avang hian kan PATHIAN hmangaihna hi hmangaihna ropui ber alo ni e.

'Pathian hmangaihna ropui zia
Thu leh hlain a hril seng lo'

Wednesday, January 26, 2011

PATHIAN MALSAWMNA KAN DAWNG

Kum 2011 kum bulah PATHIAN malsawmna ropui tak mai kan dawng a, Scooty thar mawi tak (a mawi in tih ve leh ve loh phei chu ka hre lem lova!) kan dawng a, kan va lawm em! Rawngbawlna tangkai taka kan hman theihnan ka blog tlawhtute zawng zawng in tawngtaipuina ka ngen nghal e.