Inspired by Television ?
National Geographic ? channel ka en a America rama electric hrui chhia an zawm lai a rawn tilang a, ka rilru ah chuan khang electric hrui chhe zawmtu te kha PA ka tita riau mai a a chhan chu engdang vang nilovin in tamtak, kawtthler leh Factory lian pui pui ten hna an thawh theih nana a pawimawhber kawlphetha a awm theih nana an NUN THAP a a chhelai siamthatu an nih vang a nita ber awm e. Tihsual palh vaih chuan awh khaih! tih ruala a chatthla ta tihna tur hmunah ei an zawng a ni.
Ka ngaihtuahzui ta zel a
Reader Digest te, Lengzema chanchinbu a mizotawnga lehlin thawnthu (tak tak) te kan han chhiar a a ziaktu tamtakte hi ram changkang lo a mite chuan ziakve tlaklo a kan ngaihte an ni a. Mahse ram kan sawinin theih loh sapram a mite chuan kan (ram changkanglo) ngaihdan ang hian an ngaive lemlo a ni ang hmun sangtak an tan an dah sak a ni. Truck Driver mai mai (mai mai =changkang heklo) thuziak pawh Best selling Magazine-ah an chhuah sak duh a helamah saptawng atanga lehlin a nih a vangin an chhungkua chanchin an rawn thaikawite chu bianga mittui far chungin kan lo chhiar ta a ni.
Inthlahchhawnna thil a ni em ?
‘Babu’ kan ti a kan ngaisang em em a a chhan ni awmbera lang chu office nuam takah chair virtheia thu chungin pen hmanga ei an zawn vang a ni maithei. He ngaihtuahna hi kan pi leh pute hun lai atanga lo awm tawh a ni awm e. Lehkha i zirloh chuan hna i thawk ang tiin an fate min zirtir a hnathawh (Kuthnathawh) chu inhremna ang hialin tun thlengin kan lo ngaita a, hei hian a hrin diklo tak chu kan rilruah sawrkar hna thawh chauh hi hnathawk emaw kan ti a hnadang reng reng kan hmuhsit phah a ni. He ngaihdan thalo tak hi kan bulvela chengve Vai kan tihho zia atanga kan lak a ni maithei, anni chuan hnam inthliarna an kal pui a chu chu hnam hnuaihnung (Kut hnathawktu te) hmuhsitna inthliarna a ni.
Sapram leh kan ram
Sap ho hi kan han ngaisang khawp a tawp deuh pir per pawh nise thlang sappui kan ti a kan en chung lah mai a, an rama kal chu sawiloh anni ho nena thla kan lak ho ringawt pawh kan album phek hmasa berah kan paste a ( zepthu chenglo kei pawhin ka ngaihsan piah lamah London velah han kal ila Fly Emirates stadium a Arsenal-in Manchester United 3-0 vela an sawp lai en phei chu ka chak leh zual). Achhan ni bera ka rin chu an changkan bik vang a ni awm e. An changkan na chhan chu mitinin an theih tawk theuh zak miahlo in an thawk a, an thawh phu theuh hlawh an hmuh vang a ni. Saprama kal Mizo tamtak hian an zuk thawh chu helaia hna hnuaihnunga kan ngaih kan thawh duhloh mi nauawmte, restaurant-ah te, mistiri etc.hnate a ni. Aizawla hming langthama mihausa pakhat fapa pawh thing mistiri hnathawkin a awm niin an sawi.
Mahse kan ramah chuan chung hnate chu thawh enah kan en lova, a thing kan ti a kan nulaten chutiang hna thawk chu pasalah an duh lova, chu chuan kuthnathawh hmanga eizawn chu changkanlohna niah min ngaihtir tlat a ni. Heihi a pawi hle kan ngaihsan sapramah chuan a nive si lo. Anni chuan hna zawng zawng hi in ang vekin an ngai a niang eng hna mah an thawk hreh lo. Hna hniam leh hnasang awm lovin eng hna pawh hi an dah pawimawh vek a thawh hreh an nei lo. Chu chuan inpumkhatna leh mi zawng zawng hlutna a siam a, sawrkar ngaihah chuan an rama cheng zawng zawng (citizenship) ho chu an pawimawh vek a ni. Mahse kan ramah chuan mipui tamtak chuan election dawn chauhin pawimawhna kan nei a ni (politician thenkhat ngaihah chuan).
He thu ka ziah chhan
Truck driver thuziah Reader Digest-in an chhuah duhna chhan chu a hnathawh kha enhniamna an neilo tihna a ni maithei a ni. India ramah (Mizoram ah pawh) chuan a tlangpuiin hmingtawpa degree nei tlar tuar ho thuziak hi kan chhiar nasa bik a hna hnuaihnung (nia kan ngaih) thawkte hian hmun an chang meuhlo. Hei hian a entir chu kuthnathawktute pawimawhna kanla hrelo tihna a ni. Zan khat pawh current tel lova awm theilote hian chunga thawkte chu kan ngaisang duh tlat lova, mechanic hote hi awm ta lo se kan motor neihve te hi a tlanthei awm silo va. Puanthui thiam te hi awmlo se eng thawmhnaw tak ha ang i maw. Lo neia eizawngte hi an va pawimawh em! an tello chuan enge kan ei ang ? Thuilo te pawh ke a i kal peihloh chuan driver hna hi hmuhsit ngawt chi a nilo maithei. Kea i kal peih loh na leh i kal thlen theih lohna zawng zawng a hruaitu che a nih kha. Khawvelah hian eikhawp hmu tur te, Pathianin mihringte changkan theihna adah hmuchhuaktur chuan enghna pawh hi a pawimawh vek a, office-a computer hmaa thuthinte an pawimawh tlukin hnadang thawktute pawh an pawimawh tho a ni. An pawimawhna leh an hnathawh a dang e tih chauh a ni.
Chumi hunah chuan
Hengte hi kan practice hunah chuan kan ram chuan changkanna lam a hawive tawh ngei ang le kan ngaihsan thlang sappui ho iang in. Kan thalaiten hnathawh hreh an nei tawh lovang a kan nula te pawn kan tlangvalte hnathawh chu tawiawmin vawkvulha eizawng chu pasala neih an hreh tawh lovang. BSc. (agri) te pawhin dawhkan atangin hna an thawk ringawt tawh lovanga a hmun ngeia kalin loneitute an pui tawh ang. Chumi hunah chuan kiltin (every field) atangin kan thawhchhuah te chu kan seng tawh ang a chung infinkhawm chuan changkanna min thlen dawn a ni. Kan hnathawh theuhte kan in hlutsak hunah chuan enghna pawh thawh hreh kan nei tawh lovang a, All Mizoram Graduate Unemployed Association pawh ‘Hnathawh Hreh neilo Pawl’ in kan thlak tawh ngei ang le. He thu hi suangtuahna a tak thlengtheilo tur Never never Land a nilova kan banphak mai a awm a ni i duh leh duh lovah a innghat e.
