Thisena inzawmna neilo mah ni ila ka pu Lian, kapu Lian ti a kan auh reng thin avang hian naupanga thuchang kan chhungte hnai tak niin ka lo ngai thin a, mahse inchhungkhat chu kan nilo tih a hnuah ka nu leh paten min hrilh a, awih har erawh ka ti deuh. Khualkhuaa kan thisen zawmpuite aimahin ka pu Liana kha kan chhungkhat tak tak ang mai nizawkin ka hre thin. Kan unau za min duat thin zia te, khawilo a kalchhuah ni a kan unau tana sum a sen hnem thin dan atangte khan min hmangaihtu tak tak niin ka hre ve thin. Aizawl new market lun laiah dawr a nei a, a in lehlo en in dawrkai khawsa thei ve pangngai tak a ni ngei ang. A dawr bungruate hi Calcutta atanga a lak a ni tlangpui a. Khatih lai khan Lengpui Airport te a la awmloh avangin Tuirial Airfield atangin Vaydoot thlawhna khan Calcutta an kal thin a. Kapu Liana pawh a dawr bungrua te la turin Vaydoot thlawhna hian Calcutta a kal reng reng thin a ni.
Vawikhat a zin chanchin min hrilh ka la hrereng mai. Fur khawchhiat laia thlawhna chuan hlauhawm zia chanchin a sawi a. An thlawhna chuanna chu chhum tam lutuk avangin vansangah nasa takin a insawi a, khami tum a dam a a khawchhuah a rinloh zia leh vanneihthlak taka Tuirial a an tum theihtak thu leh Pathianin a nun ala humhim avanga a vanneih zia min hrilh thin a ni. Calcutta-a a kal chang tamtak hian kan unauza tan naupang lawm eng eng emaw min rawn hawn thin a. An ina a thil min rawn hawn kan va lam changa kan lawmzia te kha ka mitthlaah ala cham reng mai. Ka unau za hian kapu Liana Calcutta zin haw hi va hmuakin Tuirial ah kan kal fo thin a ni. Mahni tawka Aizawl dawrkai hausa leh khawsa thei a nihna avang te pawh a ni maithei mifel leh nuntha tak nisi hian Pathian lam hi a ngaihsak vak lova. Pathian va hnaih em em lova hlim taka awm thei ah a inngai te pawh a ni maithei e, chuvang chuan kapu Liana pawh hian sakhuana hi a la lap angreng a ni.
Mi tamtak hi chuan an nitin khawsak na a an duh leh mamawh te nei ni a an inhriat hi chuan Pathian ngaihsak hi a har kan tithin reng a ni. Kan hriselna a tha a, sum leh pai khawsak nawmna tawk vel kan nei bawk a. Then leh rual nen hlim takin nitin hun kan hmang a, mite ngaihah mi pangngai tak nih ve bawk chuan mi tamtak chuan sakhuana pawimawh zia kan man phalo fo thin.
Mahse a nun inthlakthlengna ropui tak mai, Pathianin chhan nei a a zin tirna (keima rilru a a awm dan chuan), Calcutta-a a zin hnuhnungber chanchin leh buaina a tawh thu te, chu a buaina atanga a Testimony ropui tak hi a ngaihnawm banglo a ni. Kan sawitel leh duh hram chu he a buaina tawh chhan hi kan chhungkua min ngaihsak luat vang a ni bawk a, chu chu ka pa in Calcutta atanga chemte tha tak rawn hawntur a a chah vang a ni. Calcutta-a zin fo thin tihtakah a kawtthler awm dan leh bazarna hmun turte a hre tha a. Hemi tum pawh hian a dawr bungrua pawh nihnih chhungin a duhtawk ang chu a lei fel a. Chumi hnu ah ka Pa chah chemte chu a lei leh a, ama hman tur nen a vaiin pathum a lei a ni. Vawi tamtak thlawhnaa chuang thin nimahse chemte leh hriamhrei lam hi a la hawn ngai lova, hemi tumah pawh hian engmah buaina a neih inring lovin a suitcase chhungah chemte hi a dah a ni. Calcutta Airport a thleng phei a, a bungruate anlo check sak a. a suitcase an han endik chuan chemte pathum an hmuchhuak a, a endiktute chuan rang lutukin Airport security an kova, kapu Liana chu thil awmdan zawh fiah tumin an hruai hrang ta a ni.
Hetih hun lai hi ramchhungah security an uluk em em lai a ni a. A hma kar lawkah helho ten India rama Airport leh hmun pawimawh thenkhat te target list an siam a. Sorkar a buai a, airport leh heng hmun pawimawh tam takah hian security an uluk em em a ni. Calcutta airport pawh target list-a awm a nih ve avangin venhimna nasa taka kalpui a ni a. Airport security pawh an strict in thlawhna a zin tur pawh an check uluk em em a. A hmaa an ngaihmawh lemloh thil pawh tunah chuan zin mite tan ken an khap tlat a ni. Chuvang chuan thlawhnaa kapu Liana'n chemte pathum a keng kha airport security te tan chuan a ngaihthat awm loh hle reng a ni. Airport security te chuan kapu Liana chu thil eng eng emaw an zawt a. Khawia tanga lokal nge tih leh khawia kal tur nge tih te an zawt uluk hle a. Kapu Liana pawh chuan an zawhna te thataka chhangin Aizawl atanga lokal a nih thu te, sumdawng mi niin Calcutta-ah a sumdawnna bungrua la tur a lokal a nih thu te tha takin a hrilh bawk a. Airport security te chuan a ID te ensakin engvanga chemte ber kher thlawhnaa keng nge a nih an zawt tel bawk a. Kapu Liana chuan ama ta tur niin Aizawla a chhungte hman tur a nihzia a hrilh bawk a. Airport security te pawh chuan thildangah rinhlelhna an nei chuang lova.
Mahse danin phalloh a ken avangin Calcutta khawpuia Police station pakhatah an hruai phei ta a ni. Police station ah pawh zawhna hrang hrang an zawt a, kapu Liana pawhin an zawhna te thatakin a chhang a. Engmah thildiklo tih a tum lohzia leh chemte pawh chu an chhungkua ina an hman tur a lei a nih thu te a sawi leh a. Police te pawhin thudik a sawi ngei niin an hria a. Chuvang chuan a Case pawh siamsak lovin chumi ni la la chuan thatakin an chhuah leh ta a ni. Kapu Liana chu a thlenna Hotel-ah a let leh a. A tuka haw turin Air ticket pawh a dang a la leh bawk a. Hotel-ah chuan chaw eiin a chaw eikhamah chuan khumah a muzal a, chumi ni a thilthleng chu a ngaihtuah let a. A hun tawn chu mak a ti ve hle a ni.
Chumi ni chuan zing dar 7 velah a thova. A inphih faia a breakfast te eiin a bungrua hawn tur te a siam fel vek a, chumi hunah airport a pan kha a ni si a. Chawhnu lamah hlim taka Aizawl thlen a inbeisei a ni. Mahse a hriatlawk reng reng loh buaina a tawng a, police station ah te hial lutin Aizawl thlen chu sawiloh tunah ngei hian nizana a riahna Hotel-ah a riak leh dawn chu a ni si a. Zahthlak te pawh a ti lek lek a ni. A chhan leh vang chu a hre khawp mai, chu chu thlawhnaa ken phal loh chemte pathum a ken vang a ni. Chumi zana kapu Liana mu chu a muhil manglo a ni ber mai. Chumi ni a a chunga thilthleng a ngaihtuah paha a rilru a lo awm lian em em chu dan phalloh thil, cheng tlemte man chemte pathumin a tihbuai zia kha a ni. Khang chemte pathum lek avang khan airport security ten an man a, zawhna tamtak an zawt bawk a. Calcutta police station-ah thleng pheiin a hmain vawi khat mah police ten hetiang hian zawhna anla zawt ngailo a ni. Kut em chu thlaklo mahse a hminga case kaltir a nih avang leh mahni ram ni lova police motor-a chuan ringawt pawh kha a tihbaiawm hrim hrim a ni. Chu mai ni lovin sum tam tak a sen belh phah a. Air ticket dang a lei leh a, hotel-ah zankhat a riah phah leh a, a ei leh in leh taxi chuan man zawng zawng nen phei chuan a seng tam viau a ni.
Mi tamtak in a buaina an tawh lai a chu buaina leh harsatna atanga lunghlu thami an chhar chhuak thin ang deuh hian chumi ni a kapu Liana'n buaina nasa tak a tawh pawh chu a hun lokal zel tura malsawmna nasa tak petu a lo ni zawk a ni. Chumi zan rei tawh lamah chuan kapu Liana chuan chemte pathum thawnthu chu a ngaihtuah chhunzawm zel a. Aizawl hruai thleng theilo tu chu chung chemte pathum mai chu anni tih a hrechiang em em a ni. A chhan chu dan phalloh a ni a, miten airport security check thataka an paltlang laiin chung dan phalloh kengte chu an luhtlang phal a ni velo a ni. Hmeichhe thudawn takin chung chemte pathum chu lo kenglo ta se hlim takin Aizawl a thleng dawn si a titein kapu Liana chuan a'n ngaihtuah zui a, mahse a nihtur a nizo miau tawh a, se bo hnua se kawngkhar ang chauh a ni tawh a ni. ‘Dan phalloh, ken luh phalloh' tih vel chuan kapu Liana rilru a luah ta reng mai a. Dik chiah chuan a hmain phalloh a ni tih a hrelawk hauh lova, mahse a hriatlohna chuan a chhan chuang reng reng silo. An man tawh hnu phei chuan zahngaihna a awm tawh lova harsatna leh buaina a tawh phah nasat zia a hre vek a ni. Chu tih lai vel chuan kapu Liana chuan thil hriat chhuah thar zawk a nei ta. Chu chu heihi a ni - ‘He leiah hian vanram min hruaithleng theilo tur thil chi hrang hrang hi kan va khawl hnem em!' tih hi.
Hemi ni a kapu Liana chunga thilthleng nen hian a inhmeh ngawt mai. Ni e, vanram kan kal theihna tur ticket leilo hian thildang tam tak he khawvelah hian kan leikhawl a. Vanram kan thlen theihlohna tur thil chi hrang hrang in mihringte hi kan inhambuai thin a ni. Kapu Liana pawhin Aizawl hruai thleng theilo tur chemte pathum alo keng miau si a, Aizawl a thlen theihloh phah a ni. Hemi ni a kapu Liana chunga thil thleng hi a hreawm viau nachungin amah kapu Liana tan chuan tuarna phena malsawmna alo nita zawk a ni. A tukah chuan kapu Liana chu a lo haw ta ngei a, minlo hmuak rawh u ti a min rawn phone lawk angin Tuirial Airfield-ah chuan kan va hmuak a. A dan pangngaiin kan unau tan chuan thil tha tak tak min rawn hawn leh a kan lawm hle a ni. Motorin Aizawl lamah kan phei a. Chumi ni tlai chu kan in a chaw ei turin kan sawm bawk a. A puala kanlo leive arsa tui titaka ei pahin hemi tuma a zin chanchin leh a Testimony ropui tak chu a sawi a, ngaihnawm titakin kan ngaithla a ni. Sakhuana la thutak em em lo leh Pathian lam ngaihsak vak ngailo kapu Liana pawh a Testimony dawn thar atang chuan mi thar a lo ni chho ta a. Tunah chuan a hlauh ber chu vanram hruai thleng thei tur nilo leh vanram a thlen theihna daltu khang chemte pathum anga la kawl a ni a, chuvang chuan vanram a thlen theihna tur thil chauh neih a duh tawh a ni.
Kum sawm hnuah, Mizoram pawna ka awm laiin chanchin lungchhiat thlak tak mai kapu Liana thih thuin min rawn deng a, a mak ka tiin na ka ti kher mai. A tellova hringnun hman ka zuam lova, kan unau za min hmangaihna avangin ka thinlungah a chamreng dawn a ni. Chutih rual erawh chuan vanram kalna tur ticket a nei tih ka hria a, Pathian angchhunga kumkhuaa hlim taka a awm tur chu ka lawmpui em em a ni. A thih atanga Mizoram ka haw hmasak berah kapu Lian thlan chu ka tlawh a. A Testimony ropui tak, min tihnawk tu leh kan beisei vanram min hruai thleng theilo tur thil te hnawl ngam turin keini ringtute hian tan kan lak a va pawimawh em tih ngaihtuah chungin kan in lam ka pan ta a ni.
