Friday, April 17, 2009

Min dilsak thin englai pawhin…

Mizo pa pakhat thuziah ka hriat reng chu, vawi khat chu zirlai a nih laiin Mizoram buai lai vel khan India sipaiin an man thut a buaina a inhnamhnawih veah leh alo tanpuitu nia an ngaih vang a ni. Jail-ah engemaw chen a tan hnuin a Court- a a kal hun alo thleng ta a, Court-ah chuan mi pakhat hian chupa chu buainaa a inhnamhnawih ve loh zia te, zirlai mai a nih thute Judge te chu a hrilhfiah sak a, Judge chuan chupa thusawi chu lo pawmin chu mizopa chuan thiam changin Jail atang chuan a chhuak ta a ni. Chupa chuan a sawi dan chuan thiam kan chang chiah chu Lal Isua in rorelna lothleng tura A pa hnena min dilsak tur hlutzia ka hrethiam ta e tiin a ziak a ni.

Kan Lal Isuan he khawvel a chhuahsan hma khan a zirtirte leh Amah ringtute kha A kalsan hnuah an beidawntur zia te, an lungngaihtur zia te a hria a, an hotupa, anlo chhuan em em mai Misual ber anga khenbeh a an hnen ata a kalbo tur chu a zirtirte dinhmun tur a ngaihtuah a a khawngaih em em a. Chuvang chuan A pa hnenah a zirtirte leh A hnu zela Amah la ringturte tan nasa takin a ngensak ta ni.

“ Ahmasa berah chuan Amah ringtute kha A pa ringtu te pawh anni tih A pa chu a’n hrilhfiah phawt a, Lal Isua ringtute chu Amah A pa ngeiin a rintir anni tih te, A pa thuzawmtu anni tihte, Lal Isua chu Pa hnen atanga chhuak a ni tih Amah ringtuten an hriat thute a sawi a”( Johana 17:6-8). “Chumi hnuah chuan ngenngawl takin he khawvel tana ngensak nilova Amah zuitute tana a ngensak thu a sawi a, khawvela A awm tawh dawnloh avangin anni ho chu lohum turte, pumkhat an nih nante a ngensak a ni. Khawvelin anni ho chu anla haw dawn a chuvang chuan Misual laka lo hum a lo tanpui thin turin A pa hnenah chuan A ngensak a ni. Lal Isua anga an lawm a kimna turte, thutaka an thianghlim ve theihna tur tein a dil bawk a ni.”(Johana 17:12-17)
Tin, chang 24-ah chuan Lal Isuan Amah ringtute chu A awmnaa awmah a duh a A pa hnenah a ngensak a ni tih kan hmu bawk a ni.

Min dilsakna hi hmangaihna thlawn niin i hre ve em? Phu hliah hliah ni ta ila – ka phulo tih ka in hria, a awm ve rengah ngai ta ila – a awm ve reng na turin enge A tan thiltha ka tih thin ? Buddhist te angin kan dam chhunga kan thiltha tih hi kan sualna aia a buk a rih chuan vanram ka kai ang ti ve ta i la – ka tla nghal ang tih ka hria. Ka nun hi uluk takin enlet dawn ta ila, ka ngamlo.

Chuvang chuan khawngaihna mak, mawi leh duhawm a lo ni. Ka phu vang te, ka beisei vangte nilovin, ka hriat vangte ka that reng vangte ni hek lovin. A hmangaihna chuaitheilo avang chauhin kan tan minlo dilsak thin a lo ni.

Englai pawh a mindilsak tu, min tanpuitu Lal Isua kan nei hi ava ropui em ! Chuvang chuan a ni miten “Tuin nge thiam loh mi chantir ang? Thia kha Krista Isua chu a ni si a; a ni, tho leh ta zawk a, Pathian ding lama awma min sawisaktu bawka kha a ni.” anlo tih theih thin ni.

3 comments:

  1. A ngaihnawm hle mai. Rilru a tithar takzet. Lo ziak zel rawh khai.

    ReplyDelete
  2. Lal Isua kaltlang in Pathian hnenah kan duh kan thlen thin si..chuvangin amah ah hian engkim min tih sak theihna a awm ani. good post

    ReplyDelete
  3. @Epistemology, i tilawmawm e, nia thiam lemlo mahila thuziah hi nuam kati ve hrim2 a, chubakah midangte tan malsawmna alo nih ve tak hlauhvin a tha dawn em asin.
    @Awzzman, Kan thiamchanna ISUA chu fakin awm rawh se

    ReplyDelete