Ka tawnmang mawl mai nise ka ti ngei mai. Hmanni ni 28th July,2009 dar 7:30 vela kan thiannu Diphu(Assam) miin thu lungchhiatthlak tak mai min rawn hrilh chu Nl. Hmangaihsangi (Sangte-i) Malaria avanga a thihthu a ni tlat mai.Ka rilru ava buai em. Awih har ka ti a ka zanmu tawnmang nise atuk zingah thangharh leh ila kan hun pangangai ang hmang leh ila ka ti a ni, mahse a tak tak a ni miau si. Chuvangin Sangte-i tan he thu hi ziaklo theilo ka ni. Ka khua a van har dawn em !
Kum 2006-a Missionary Pre Service kan training ho kha Sangte-i nena kan in hriatna hmasa ber a ni a, nula fel, midangte tana ngainat awm tak a ni. Amah hi Nagpur University atanga M.Com chhuak niin zirna lamah pawh mi vantlang chunglama mi ani kan tithei awm e. Kan training luh tirh lampang khan kan testimony, missionary-a kan inpekna chhan Chapel-ah leh Class room-ah te kan sawi thin a, tin Biakin hrang hrang a kan kalna ah pawh kan in sawi chhawk thin. Sangte-i Testimony sawi kala hriat reng chu Nagpur-a lehkha a zirlai hian vawikhat chu kawngsirah hian mi pakhat thia lolet reng hi a hmu a tumah hian buaipui anlo tum lova chuchuan a rilru a khawih em em thu a sawi a. Kha mitthi a ruang pawh hlawmtu nei mumallo kha keimahni ang thova Pathianin a hmangaih a ni tiin a rilru alo na em em tih thute a sawi a ni. Nagpur-a a awmlai te khan khawithluktheihna neih (Fakte-a lar vanglai kha a ni a) a khawilai hmun ualau deuhva tanga mitamtak khawithluk a Pathiana piantharna neihtir te kha a chak thin a ni. Chutiang taka Pathian tana thahnemngaia a rilru lo seng thin chu a ni. Tichuan Training kan nei zova kan awmna hmun tur lam kan pan sang sang a, ani pawh Salem Boarding-ah kum hnih a awmhnuin tun kumtir khan Diphu (Karbi Anglong) ah transfer niin kum chanve hnu lekah ropuina ramah minlo kaisan ta a ni. Kum 2006-a Pre Service kan training pui mi pahnih ten kumthum pawh la ral hmain van kohna anlo chhang ta a ava mak em tih mailoh chu sawitur ka hrelo Pathian thil rel dan hi a mak a ni.
Kraws kawng zawh hi a lova hautak em ! Nunna a phut tlat a ni. Mahse “kei heta hi ka awm” kan ti tawh si a, hawna remchang hmupawh lo ni ila hnunglam hawikir thei kan ni tawhlo.
Hmangaihsangi hi kan u chiah rual mah nise anau chiah te nen hian naupan tet atanga inkawm sikul ah pawh tlar khata thu thin kan nih avangin, a thih thu ka hria chu thildang rilru ah a awm thei lo.A nunah khan sawisel tur ka hre ngai lo, ka chhuangin missionary tur hliah hliah niin ka hre thin a. Hun lo taka chatuan ram min pansanta hi ka uiin a chhungte khawhar tur zia pawh ka hrethiam pha ve in ka hria.
ReplyDelete