Duhthlanna sangber

Mathematics subject hi ka tui vena a nia, sikul ka kal lai pawh khan subject dang ai chuan a tlangpuiin zir nuam ka tiin mark pawh ka hmu sang thin keima tawk ah chuan. He thu ka ziah dawn a ka rilru a lolang pakhat chu mathematics subject-a pawimawh em em parallel lines (rin ngil pahnih a bul atanga a tawp thlenga a zau zawng in ang/tluk ti ila a fiah mai awm e) hi a ni.

Parallel line in a entir pawimawh tak pakhat nia ka hriat ve chu kawng ngil taka kan kal theih nan kan chhuah tanna (starting point) kan hriatchian a pawimawh a ni. Line pahnih zinga a pakhat zawk khi a tirah tlemtein lo kawi ta sela chu parallel line an ni thei lovanga, a line khi a sei/thui tawlh tawlh ang a an in hlat tial tial dawn a ni. Motor pahnih khi kawngah khian tlan ta sela, km 1 ah chuan anla inthlau lutuk lovanga km 10 ah chuan an in thlau tawh viau ang, chutiang chuan an tlan hlat zawh poh leh an inthlau mai dawn a ni. Motor a tir atanga kawng kawia tlan chuan an thlenna tur (destination) a thleng ve thei dawn lo ani.

Kan Pathian hian min hmangaih em avangin kan nuna kawng kan zawh tan dawn reng reng in kan chhia leh tha fim tak hmanga duhthlanna (thutlukna- decision) siam min phal sak thin a. Kan chhuah tanna a pawimawhzia chu a chungah ka’n sawi tawh a khi khian duhthlanna/thutlukna dik a pawimawhzia min hrilh a ni. A tir atanga kawng diklo zawhtu kan nih chuan kan tum ram kan thlenglo thei a, a hnua thleng tura kan beih leh pawhin kan thiante kawng ngila kal te um reng rengin kan khawsa a khua kan tlai phah fo thin.

Khawvel a lo changkang a nawmchenna khawvel a lo ni a, Lal Isua aiin mi tamtakin an duhthlanna hmang diklo in khawvel anlo thlang ta. Reilote atana sual nawmna hlimpuiin Lal Isua avanga tuar an peih lova, atir atanga kawng ngillo an zawh tlat avangin an thlenna tur hmunah mi tamtak an theng ve thei talo a ni. Kawng ngil taka kan kal theih nan duhthlanna dik a pawimawh a keimahni mai chuan he thutlukna pawimawh ber hi kan siam thiam lo a ni. Chuvang chuan Thlarau Thianglim sawm ila kan duhthlanna sangber Lal Isua hnenah I hlan ang u. Amah kan Pathian ngeiin ‘Nunna chu thlang rawh u, in nun theih nan’ a ti si a.

Tlawmna Nun

Changthlan , Philipi 2 : 5-7
“ He rilru, Krista Isua pawha awm bawk kha, nangmahniah awm rawh se ; ani zawngin Pathian anga awma Pathian tluka awm chu thil thlakhlelh hleih theihaha a ruat lova, mi hringte anga lo piangin, bawih angah a insiam a, amah leh amah a intitlawm ta zawk a”

Nikum 2008 Krismas laia ka rilru hneh em em tu chu Isua Krista inngaihtlawmna, chumi avanga Ama siam mihringte hnena a lokal hi a ni a. A ropui ka ti em em a ni. Mizote nuna thil pakhat mawi em em chu ‘Tlawmngaihna’ hi a ni. Thian chhan thih ngam, midangten an neihve na tur a nih chuan kei chu ka changve lo mai ang tihna rilru a ni a, rilru a mahni aia midang ngaih pawimawhna a ni.Chu chu kan Lal Isua zia a ni a, van ropuina kalsana, Amah leh Amah intitlawm a, midangte tana a thisen far tawp thleng a inpe pumhlum thak a ni. A thihna avangin midangten nunna kanlo chang thei a ni. Chu chu mahni indahtha a midangte tana nunna dik tak chu a ni. Amah ringtu te tan hian entawn tur min va hnutchhiah nasa em!
Tlawmna hi mahni inngaihhniamna ni lovin midangte mahni aia tha a ngaihna te, midangte ngaih pawimawh hmasak zawkna (mahni inngai pawimawh lo nilovin) te a ni a chu chu hmangaihna tihte nen pawh kan thlunzawn thei awm e. Midangte ngaihsakna te, an thatna tura thil tih sak te hi a rahchhuah a ni a chu chuan ‘remna leh muanna’ a thlen thin a ni.
Van ropuina pawh thlahlel hlei thei lovin kan Lal Isua chu he khawvel chhandamturin a rawn kal a chu chuan ‘thuawihna’ a entir bawk. Thihna Atana ruat chu huphurh em em in ‘Kapa he no hian min pel lul rawh se’ ti a ngenin, mahse Chhandama kan lo awm theihnan (midangte tan) A pa thu chu a awih a ni. Ringtuten Pathian fapa thuawih A pa tirhna hniallo kan nei hi kan va nihlawh em!
Tlawmna nun neite tan Lalpan hmun ropui tak vanram min buatsaih sak a, chutih hunah chuan inngaitlawmte chawimawiin an awmve tawh dawn a ni. Heng thiltha zawng zawng hi kan chan theihna turin a hnung kan zui Kan Lal Isua dungthulin inngaitlawmin ringtute i kal zel ang u.
Lalpan A thu malsawm rawh se. Amen

Vision City

Tunlai chu ka post khat khawp mai a, hei a latest