Friday, November 13, 2009

Tlawmna Nun

Changthlan , Philipi 2 : 5-7
“ He rilru, Krista Isua pawha awm bawk kha, nangmahniah awm rawh se ; ani zawngin Pathian anga awma Pathian tluka awm chu thil thlakhlelh hleih theihaha a ruat lova, mi hringte anga lo piangin, bawih angah a insiam a, amah leh amah a intitlawm ta zawk a”

Nikum 2008 Krismas laia ka rilru hneh em em tu chu Isua Krista inngaihtlawmna, chumi avanga Ama siam mihringte hnena a lokal hi a ni a. A ropui ka ti em em a ni. Mizote nuna thil pakhat mawi em em chu ‘Tlawmngaihna’ hi a ni. Thian chhan thih ngam, midangten an neihve na tur a nih chuan kei chu ka changve lo mai ang tihna rilru a ni a, rilru a mahni aia midang ngaih pawimawhna a ni.Chu chu kan Lal Isua zia a ni a, van ropuina kalsana, Amah leh Amah intitlawm a, midangte tana a thisen far tawp thleng a inpe pumhlum thak a ni. A thihna avangin midangten nunna kanlo chang thei a ni. Chu chu mahni indahtha a midangte tana nunna dik tak chu a ni. Amah ringtu te tan hian entawn tur min va hnutchhiah nasa em!
Tlawmna hi mahni inngaihhniamna ni lovin midangte mahni aia tha a ngaihna te, midangte ngaih pawimawh hmasak zawkna (mahni inngai pawimawh lo nilovin) te a ni a chu chu hmangaihna tihte nen pawh kan thlunzawn thei awm e. Midangte ngaihsakna te, an thatna tura thil tih sak te hi a rahchhuah a ni a chu chuan ‘remna leh muanna’ a thlen thin a ni.
Van ropuina pawh thlahlel hlei thei lovin kan Lal Isua chu he khawvel chhandamturin a rawn kal a chu chuan ‘thuawihna’ a entir bawk. Thihna Atana ruat chu huphurh em em in ‘Kapa he no hian min pel lul rawh se’ ti a ngenin, mahse Chhandama kan lo awm theihnan (midangte tan) A pa thu chu a awih a ni. Ringtuten Pathian fapa thuawih A pa tirhna hniallo kan nei hi kan va nihlawh em!
Tlawmna nun neite tan Lalpan hmun ropui tak vanram min buatsaih sak a, chutih hunah chuan inngaitlawmte chawimawiin an awmve tawh dawn a ni. Heng thiltha zawng zawng hi kan chan theihna turin a hnung kan zui Kan Lal Isua dungthulin inngaitlawmin ringtute i kal zel ang u.
Lalpan A thu malsawm rawh se. Amen

2 comments:

  1. tukin 15/11/09, sunday sermon ropui tak chhiar tur min hlui avangin ka lawm e.

    Lal Isua tlawmna nun kha a ropui hle, tlawmna nun kha lo nei lo ta se chuan...kei ni hi Chhandam fate kan ni a ngem? Tlawmna nun hi nula leh tlangval inngaizawng te inkarah pawh hian..a awm tur ani, chu chu ka thupui a ni ve fo! relationship tra nei tur chuan... Lal Isua ang a, tlawmna nun neih a pawimawh hle.

    ReplyDelete
  2. @ Awzman, Engvangin nge tui zawng2 hi tuifinriatah an luanluh vek, a chhanna tawite chu a inphahhniam em vang a ni an ti. Inngaitlawmte chu chawimawiin anla awm dawn si a.

    ReplyDelete