Saturday, February 12, 2011

Kala hmangaih reng che asin

Bul tanna

Ni leh thla, kum tam alo liam leh ta reng mai. Ka duh a Ka thlang chhuak a mipui sang tam tak zing atangin. A ni aia tha, mawi leh Keima nihna nena inhmeh hliah hliah zawk tur pawh Ka hmulo a nilo. Mahse engin nge min mawlh le!...Ka hmangaih tlat si. Ka han inpuang law law ange - mite itsik thamin a ni Ka hmangaih ni. Amahah hian Ka tana chhenfakawm vena tur pawh a awmlo mai ni lovin amah avang hian vawi tam tak Ka rum zawk a ni. Hun lo la awm zel tur chatuan chatuan thleng pawhin tiin Ka hmangaihna Ka hlan a,Ka duh em avangin atan kumkhua pawhin Ka rinawm ang tiin Ka in tiam bawk a. He hmangaihna hian hrualhrui angin chat lovin Min phuar bet tlat a ni.

Mahse tangdang zunah maw ilo uai a

Hun leh nite tuilian angin anlo liam zel a. Hlim takin Kan lengdun zel dawn emaw Ka tih laiin phatsanna tenawm tak Ka tawk ta zeuh zeuh mai. Sal ang maia a awmlaia Ka chhanchhuah te, miten mi pangngaia an hmuh ve theihna tur atan a Ka thiltih sak zawng zawng te chu Ka duhtaki chuan hmusitin tangdang minlo belhsan ta a ni. Kei aia amah duat leh ngaihsaktu hmu niawm maiin Ka lam alo hawi duh ta lova. Heng an chanchin zawng zawng te hi hmulo in hrelo thei ni ila chuan Ka chhungril natna tamtak hi a kiam tur a nia le! Lungngaiin Ka rum a ni! Ka hmangaih si a. A sakhming Ka sawi nin theihloh ka atang chuan selna anka pawh Ka tawng ta zeuh zeuh mai le, eng a ti zota ni maw! Ka duat, Ka enchimloh leh a mualpho hlau reng renga Ka tuamhlawm thin chuan Ka hmangaihna chu ngainepin Ka tangah alo bei duh talo.

Ka suangtuahna vakvel

Ka parmawite-i chu ka lam hawiin lo nui leh se tiin ka thlir vawng vawng thin. Amah ngaia ka awmlai min hnem tur an awm si lo. Ka lungdumtu ngei hi inchhirin lo let leh sela, Ka lunglawm a kim tur a nia le! A chang hi chuan Ka lam hlata a awm nasat poh leh Ka hmangaihna hi a zual nite hian Ka hre thin a, amah hmangaihtu diktak hi Min han hrechiang selang chuan Ka hmangaihna chu a van chhanglet nasa dawn em!

PATHIAN HMANGAIHNA ROPUI ZIA

Hosea bu ka chhiar a. He lehkhabu-ah hian PATHIAN hmangaihna nasat zia a lang nasa hle mai. Nu leh pain an fate an hmangaihna nasa ber an pek aia nasa in Pathianin Israel fate hi a hmangaih a ni (Isaiah 49:14, Nimahsela Zion chuan, 'Jehovan mi kalsan a, Lalpan mi theihngilh ta,' a ti a. Hmeichhiain a fapa, a rila rah chu khawngaih lohna turn a nau hnute hne lai chu a theihnghilh thei em ni? Thei e, chungte chuan an theihnghilh a ni thei e, nimahsela kei chuan ka theihnghilh lovang che). Engmah nilo, mite hmusit leh nuihzat Israel fate an saltanna atangin a hruai chhuak a. An tana ram a buatsaih sakah a hruai thleng a. Hmangaihna sawifiah hleihtheih lohvin a hmangaihin a tuamhlawm a. An mualpho a hlau va, an ralte a dopuiin hnehna a pe a. Mahse Pathian hmangaihna chu hnawlin an tet lai atanga anmahni enkawltu leh duat em em tu chu tlan bosanin an uire san a ni. Hmangaihtu rilru chu a rum ngei ang. Mahse hmangaihna a khat leh thutiama rinawm kan Pathian chuan Israel fate chu ala hmangaih a, an uire chung pawhin a la duh a ni tih tihlan nan Hosea chu uire nu Gomeri nupuia nei turin a ti a ni. (Hosea 3:1, Tin, LALPA chuan ka hnenah, Kal leh tala, hmeichhia, midang duhlai, uirenu chu va hmangaih rawh, Israela thlahte chu pathian dang hnen lam hawiin grep chhang ngaina mahse, LALPAN a hmangaih reng ang bawk hian, a ti a). Chumai ni lovin kan Pathian chuan a duhsak ngaiin la duhsak rengin a lainatna chu a la lantir reng a ni tih a hriattir bawk a. (Hosea 2:23, Tin, ani chu katan leiah ka ching ang a; Lainatdawnglovi chu ka lainat ang a, Kaminilova chu, "Ka mi i ni," ka ti ang a, Tin, anin, "Ka Pathian i ni," a ti ang).

Kei ka tan a hlu

A ang chhung ata vawi tamtak tlan bo thin, malsawmna nasa taka min vur chung pawh a lawmthusawi ngailo chung pawh a malsawmna a min vur reng te hi khawngaihna vang a ni. A man ngaihtuah hauh lova hmangaihna hi min duhsakna vang a ni. Ka khawlohna avanga hrem tur chhush zalen ka ni hi Chhandamna chu a ni. Mahni nunna pawh inhlan ral thak ngam hi hmangaihna thlawn a ni. Misualte A bula min awmtir phal ve avang hian kan PATHIAN hmangaihna hi hmangaihna ropui ber alo ni e.

'Pathian hmangaihna ropui zia
Thu leh hlain a hril seng lo'

5 comments:

  1. I tehkhin thu hian i thu sawi tum hi tehkhin phaklo mahse, a teuh ber pawl chu a ni ve ngei ang. Hmangaih tlak lohte min hmangaih a, chutichung pawh a, la tlan san a, A hnen pan duh ngailote hi enge maw kan nih le ka ti ve thin.

    ReplyDelete
  2. Pathian hmangaihna hi zawng a rilin a thuk a ni e tiraw. Tunlai ka rilrua awm chiah i rawn sawi chhuak. Misual.com ah sunday pualin 'min phuar nghet zel rawh Lalpa, nang nen' tih ka ziak ta ringawt. Ka chhiar hi ka lawm hle mai, Thianpa.

    ReplyDelete
  3. Sermon tha tak anih hi. Chhiar man a awm hle mai. Mihringte hmangaihna hi chuan rei a daih ngai lo. Kan rilru hi a inlet thut thin a, Pathian hmangaihna erawh a danglam ve ngai lo.

    Pathian hmangaihna hi a rilin a thuk hle. Mihring tawng leh hla mai hian a phawk chhuak zo tak tak lovang. Pathian ngaihah chuan pawnchhe hnangkhai leh eklung ang mai chauh kan ni a. Eklung hausa deuh te, eklung fai deuh te, eklung hmeltha deuhte ang lek chauh kan ni. Lei vaivut hmanga a siam mihring, amah siamtu phatsana A hmelma Setana lama kalsantu, chhanchhuak tura mahni leh mahni inti tlawm a, a ropuina zawng zawng kalsan vek theitu, keimahni avanga hmuhsitna, endawngna, zahna tuartu, a siam mihringte tluk leka hniama rawn indah theitu hmangaihna hi a va ropui tak em. Pathian hnena kan sual thawi dam nan na leh hrehawm tinreng tuara kraws lera khai kana awm a, thihna hneha tho leh Isua hmangaihna hi a ropui a ni.

    Kan nawmsak laiin amah kan hre duh lova, atan engmah kan huam ve hek lo. Ani erawh chuan tuisik mai kan nihlai atang tawha min hmangaihin, kan nawmsak lai ber atanga thihna luipui kan dai thlengin min hmangaih reng thin a, min kalsan ngai lo.

    Suala ka bosan thin pawha min hmangaih reng thin tu Pathian min hmangaihna hi a rilin a va lo thuk em.

    ReplyDelete
  4. Hmangaihna hlut zia i ziak chiang viauvin ka hria. Pathian hmangaihna hi a hluin a thuk a, keini hmangaihna nena tehkhin ngam chi pawh a ni lo. Sual ata min tanin, a tawrhna avang liau liauvin, a hmangaihna avangin mihringte hi Chhandam kan ni. Chhandam mai kan ni lo va, hmangaihnain min la enkawl zui a...A.. Sawisen a ni lo. Hmangaihna hi a ropui a ni.

    ReplyDelete
  5. @Elysian-Ni e tiraw, khawvela kan inhmangaihna te hian kan PATHIAN hmangaihna hi a tehkhin phak mawlh love.
    @Rp Pachuau-Thlarauah hian inchawhthawh tawn a theih hle asin, misual.com etc. ah pawh i ziak zel ang u, keimahni leh midangte tan a tangkai thin.
    @caribou - I va ti lawmawm ve,i ziak chu tluklo mahse ka thiamtawk a ni e.
    @TS-Hmangaihna in min enkawl zuia...a dik hle mai, min thlahthlam ngai silo.

    ReplyDelete