Tuesday, June 28, 2011

Chhingmit intawng chu

Rawllai ka ‘d’

Mihring kum chhiarnaah chuan alo rei ve ta hle mai kan tleirawl lai hun te kha. Belpui vala val ve ta na na na chuan duhte kanlo tawng ve a. Ni e, khatih hun lai khan ‘hmangaih’ ka tawng ve a ni. Ka ngaihzawng ti satliah lovin ka ‘d’ tiin ka ko hnap thin a, ka tan khuavel a ti parmawi thin! Kan ‘nih’ tan dan pawh ho te a ni. Vengkhat kan ni a, kan in pawh inhlat lote a ni. A u te nen phei chuan naupan lai atanga inkawm thin kan ni a.

Amah hi kei aia a naupan deuh avangin nau enin ka en thin. Mahse…zan khat chu tuikhurah tui kan chawi a (khatih hun lai khan kan khua hian PHE tui connection kanla nei ve lo), keini tleirawl kha chuan tin khat hi kan kawt zo chiah lova, a chanve aia sang deuhte kan kawt a. Kan tui chawi hawlam chu kan thian hovin hmun pakhatah kan chawl a, kan chawlh atanga rei vaklo ah chuan ka thiani te pawh an tuichawi hawlam an rawn thleng ve a.

Lo chawlve tura kan tih chuan anlo chawl ve mai a. Tlema kawngpui atanga piah deuhvah kan thukhawm laih mai a, amah hi a hma pawha kalo mitmei ruk thin leh ka thiante hnenah pawh ka sawi thin avangin nakinah chuan ka thiante chuan ka rilru hria niawm takin ‘chance’ min pe ta a ni. Tichuan chumi zan atang chuan ‘d’ kalo nei ve ta. Hmangaih lehkha kan inthawn dan leh kan inkar a kip akawi chu sawilo mai ila, mahse sawi hmaih phal miahloh chu Inrinni tlai inbual fai zawh ver vawra ka ‘d ‘te inbula han len kha a ni. Ka hmuhturin pawnah a rawn chhuak ngei thin a, ava nuam thin em!

Tuantul vangin Zawlkhawpuiah

Kan khuaah vanneihthlak takin Matric ka pass a, science subject lak ka duh avangin kan khuaa zirzawmna awm ta silo chu Aizawl khawpui lamah kal a ngai ta. Matric ka pass kan lawm ni a ka ‘d’ hlimzia leh Zawlkhawpui ka pan dawn zana a hmel te chu lei leh van ang hlauh a ni. Mahse kan pahnih atan a that zawk tur zia hrilhfiah chungin inngai tak chungin Aizawl ka pan san ta a. Kan khua hi kala chhuahsan ngai vakloh avangin Aizawlah hmelhriat mumal nei talo chu ka lung a leng thin kher mai. Hun erawh a kal liam duak duak a. Mahse mihring hi alo mak a nih hi, thla tam a liam hmain lehkha kan in thawn tlem tial tial a. Thla riat vel naah chuan ka ‘d’ lehkha hmuh tur a awm tawhlo. Chutiang bawkin keipawh Aizawl ka thlen thlak tirha lehkhathawn ziah ka peih ang a ni ta derlo mai. Ka Hmangaihna a chuai ta em ni?

Lam ang kalo let leh ta

Kumkhat dawn kan khuaa haw lova ka awm hnuah chuan nikhat chu hawna hun remchang ka hmu ta hlauh mai a. Inrinni tlaiah kan khaw Bus-ah ka thuvang mai a, tlai dar 5 velah kan khua him takin Pathian zarah kan thleng a ni. Ka thlen veleh chuan ka thiante ho pawh an rawn leng sap sap a, an thu hriat chak pakhat ka ‘d’ nena kan chanchin min zawt a. Mahse chhan ngaihna vak ka hrelo, lehkha pawh kan inthawn ngai tawhloh thu leh kan ‘nih’ tawh loh thuin ka chhang mai a.

Chawte ka’n eikham a, hemi zan atang hian kan khua naupang Sunday School Inkhawmpui Venglai BiakIna a awm dawn avangin kan thian ho pawh Inkhawm turin kan inau khawm a. Tan hma hretin kan thleng a, BiakIn chhung chu a lokhat vek tawh mai a. Keini chu BiakIn hnung Pulpit chung zawn lama Balcony-ah kan thu a. Mipui ep zawnga kan thut bakah tlar hmasa berah kan thu si a, kan lang chiang kher mai.

Chhingmit a intawng

Inkhawm kan tan a, tan atanga rei vaklo ah chuan hmeichhe thutna lampang tlar laiah chuan ka ‘d’ (hlui) ngei mai thu ka zu hmufuh ta. Ka zuk en a a ni chuan a hma tang khan minlo hmuin minlo en reng tawh ni awm tak a ni ka’n en (melh) ve chuan hmuhnawm min tih hmel tak hian minlo thlir reng mai a. Ka rilru-ah thildang a awm tawh lo, kan tuichawi zana ka hmangaihna kha a lokir lehta niber hian ka hria. Duhthawh taka kan mit leh mit kan han in tawntir chu ka tuiral hi a ni ber mai.

A va nuam em! Ni e, khami ‘hun’ atang khan kan induhna alo pung a, kan inhmangaihna chu ahma aia nasain chhem alhin a lo awm leh ta. Inkhawm kan bang a, ka thiante ho bula kal lovin ka ‘d’ (thar) chu ka zawng nghal vat vat a. Kan han inhmu chu inzah tak chungin kan in chibaia. Chutah chuan ka lenna tur tuma zawh ka ngailo keimahah hian a chiang vek tawh. An inlam panin kan haw dun a, rawn leng rawh a tih hi ka nghak phal tawhlo, ka rawn leng dawn aw tiin ka zawt nghal a. Ani pawhin lawmtakin alo ‘aw’ a, a tawi zawngin sawi ila kan in hmangaihna chu kan ‘rewind’ leh ta a ni.

Lal ISUA nen in chhingmit a intawng ve tawh em?

He thu ka ziah chhan ber chu Lal ISUA nen kan chhingmit hi a intawng ve tawh em? tih hi a ni. Peter-a phatsantu tenawm pawh vawi thum a phat hnua Lal Isua’n a mita a enkalh chuan a tuiral zawih zawih mai. Tirhkoh Paula pawh Lal Isua, a tihduhdah thin eng chuan a chhun thlu a, a thinlung chu a va danglam nasa tehreng em.

Chhiartu duhtak, kan mit leh Lal Isua mit a intawn meuh hi chuan khawiah nge kan kal anga, enge kan tih ang tih hi zawh kanla ngai dawn em ni? Keipawh kalo theihnghilh tawh, mahse chiang tak maia kan chhingmit a intawn avangin ka ‘d’ hlui kha ka ‘d’ thar alo ni leh ta a. An run sang kaiin nauang kan nui za leh theita a ni. Lal Isua nen in intawn hun chuan rinhlelhnain I khat tawh lovang a, Amah ring chungin Amah chu I theihna zawng zawng nen i fak tawh zawk ang.

7 comments:

  1. Hei chu misual.com ha khan ka chhiar tawh tho nain ka chhiar nawn leha a ngaihnawm dan ala ngai reng tho mai.

    Thingtlangah chuan tui a harsa thin bawka ka chawi nasa ve thin khawp mai, tleirawl kan rualpui tawk lek lek te nena tui kang han nghah te kha a lo nuam mai mai, duhaiin tui kha a lo tling chak mah mah thin :-)

    Lo duh ruk deuh reuh reuh kan sawi chhuah ngam si lohten min lo haw lo viau a ni tih hriat tluka thu lawmawm kha a vang khawp a sin.

    ReplyDelete
  2. "Tun tum chu Pathian thu tel miah lo thuziak min chhawp chhuak ve dawn a ni maw," ka lo ti hman tawh a. Nang nge nge, engti zawng pawhin thu ziak thin mah la, a hnu kharna chu, a rawng i bawl thin Pathian ah zel a lo ni thin anih hi. I ziak ngaihnawm khawp mai.

    ReplyDelete
  3. I publish tirh khan phone atangin ka lut a, ka comment dawn a, word verification a lang thei miau lova, ka comment thei ta lo a ni. Word verification hi paih daih la ka ti.

    A tha ka ti khawp mai. Nula leh tlangval inhmangaihna thu ngawr ngawr a ni dawn emaw ka ti a, sermon ropui tak a lo ni zawk a. Engtik lai pawha kan tana awma min hmangaih rengtu, Lal Isua mit kan tawn tawh hi tlansan lovin bawhzui ila chuan damchhung hlim takin kan hmangral thei tur le.

    ReplyDelete
  4. @triplestar-chu ilo experience ve tawh ni maw? Sawitur pawh i ngah viau ang a. Khang hunlai kha ngaihawm ve mai mai khawp mai.
    @Pu Caribou-Ni e, Article dang han ziah pawh ka rilruaah a awm thin a, mahse ka pamtul leh thin. Kan bul leh tawp hi PATHIAN a ni miau mai si a. Tin, rawngbawltu ka nih avang hian ka vei zawng tamtak han ziah vak hi mite mit ka tikham ang tihte ka hlau ve thin bawk nen,Pathian zara dam chuan article dangte pawh ziah zel ka tum e.
    @ Pu Ts-a, Ka tum tak pakhat i man fuh hle mai. Miin ngaihnawm deuh an tih tur chutang an chhiar an chhiar atanga an rilru Pathian lama hruai thei tur ania ka tum chu. Mahse ka thiam tawk lohna avangin ka ziak ngaihnawm thiam ve lova, he thu hi mite tan Pathian hnaih zual tirtu lo nise tihhi ka duh hle a ni.

    ReplyDelete
  5. Lungrun tawk leh mood a cheng ngawih ngawih in ka chhiar thla a, a hnu i khar dan chu ka rin loh lam daih a ni, a tha lo la tihna nilovin, thil dangah min kaipeng hneh ngei mai, a tha lutuk e, lo ti zel teh khai, engkim hi nie, kan rin ngam phawt chuan, tlai ngai lo Pathian leh engkim ti thei a ni tak meuh mai,..

    ReplyDelete
  6. @Hmelthatea-Ka blog-ah ilo lut ve a ka lawm hle mai. Ni e, ka thuziah dan khi ka comment hmasa ah khian ka sawi nual tawh a. Thawnthu ngaihnawm atanga Pathian thu sawi a ni ber mai (Ngaihnawm in tih leh tihloh chu ka hre chuang lova:). Mite chhiar duhzawng atanga bul tana chutah an rilru Pathian lama kaihpeng kha ka tum tak chu a ni. Nang pawhin ka tumdan i man fuh a a lawmawm hle mai. I duh hun hunah lo leng zel ang che.

    ReplyDelete
  7. Ziak ngaihnawm hle mai... ka tum loh deuhin a tawpna i siam a, tha ka ti kher mai! Lal Isua nena kan intawn ni kha chu theihnghilh theih ani tawh lo ani!

    ReplyDelete