Nun inthlakthleng chu…

Mitin mai chuan Krismas hlimawm tak lo thleng tur chu nghakhlel em em in an thlir a, ani pawh a bang bik awm love. A sum leh pai neih te chuan thiltui hnai tak tak a lei a, chung zingah chuan a fate Krismas present pek tur te, Krismas ni a an hemhmin tur arsa tamtawk tak, ‘tun kum hi vur a tlak nasat em vangin a vawt zual a chuvang chuan kawrlum tha tlem aman tam deuh lei teh ang’ ti a a lei te chu Motor hnungah chuan a dah a. Zirtawpni a ni a, a hmalamah enge lo thleng dawn tih hre lovin an khawlamah a fanu naupang te nen chuan Krismas hmang turin an chhuak ta a ni. Khua an pel fel a, tluangtakin an tlan zel a, vur lah chu a tla tam em em mai a, a car kawngkhar ah te chuan vur hi a rawn var phek phek bawk a.

Mel engemaw zat an tlan tawh a, mahse an khua hi a hlat tham deuh avangin mel sawmnga vel tlan an la hma bak a. A rilru ah chuan thil tamtak a ngaihtuah in ka ring. Ala naupang a, a hmel lah a thatawk. An hausa a, pasal tha tak a nei bawk. Mite chung en an ni a, chuvang chuan khawvel hi nuam a ti a engdangmah a mamawh lo. Tunah pawh Krismas hmang turin a nu leh pate, a pasal ten anlo nghak mek a ni. Darkar reilo te ah an inah an in hmu khawm ang a, tu dang mah an ngai leh lovang. Krismas te chu kumdang ang thovin ‘Krismas awm chhan’ ngaihtuah lem lovin an hmang leh ang a, mahse harsatna a awm lem loh chuan nuam anti leh viau thovang.
Chung te leh thildang tamtak a ngaituah lai chuan vawi leh khat ah a car chu a rawn in sawh dawt dawt a, thil a ngaihtuah nasat lutuk avangin a car khalh lai alo ngaihthah deuhva, duh aia chakin a tlan a lo ni. A tlan chak tawh lutuk avangin a car khalh lai chu a thunun zo tawh lova a hmabak hmasa ber chu a himna tur a kawngsira motor din theihna tura engemaw sut tur zawn chu a ni. Chutianga a tih chauh loh chuan a nu leh pa leh a pasal hmu tur a awm tawh hauh lovang le.

A rilru ah chuan he hun reilo te chhung hian thil tamtak a rawn lang nghal zuai zuai a. A tunhma hun lo hman dan chu khawthian em em zana arsi chiang taka kan hmuh thin aia chiangin a mitthlaah chuan a rawn lang nghal pur pur a. Mahse a ngaihtuah rei ngamlo, a duh ber chu ‘a hunhman tawh zawng zawng a bul atanga hman that leh’ a ni. Nunna siamtu a ni lova, a taksa chungah hian thu a neih bawk si loh avangin a duhthusam hi a thleng dik angem tih a hre bawk si lo. A rilru a hreawm em em a, tun hmaa a hlimna te chu a huntawp darkar ah chuan amah ti lungngaitu a lo ni ta a ni. A hlau lutuk chu a au chhuak thawt thawt a.

Chutia hlauhlawp chunga a in dawm kunreng lai chuan thil pakhat ngaihtuah chhuah a nei ta a. Hun reitak chhung a lo thlauhthlak tawh mi pakhat amah tanpui theitu a awm a ni tih a hrethar leh ta a. Mitkhap kar pawh inngaihtuah lovin a lu a kun a a tawngtai ta a ni. ‘Aw LALPA, kum tamtak chhung nangmah hrelo leh ngaituah ngai lova kalo awm thin avangin min ngaidam ang che. Tunah chuan, zanin atang ngei hian ka nun hi i tan chauh ka hlan tawh ang a, nun inthlakthleng ka nei tawh ang’ tiin rilru leh tihtakzetin a tawngtai ta a ni.

Chutichuan thilsiam thar alo nih tawh avangin a nun dan chu ama thu a ni tawhlo tih a hria a, kawng engkimah ‘ISUA telloh na chu thihna’ a ni tih a hrechiang tawh a. A nun pumpui in nghahnan ‘Engkimtitheia’ chu a hman tlat tawh avangin mahni thu a kal a tum talo. ‘JESUS TAKE THE WHEEL’ tia Isua chu sawm chungin a hringnun lamtluang zawh hmabakte chu zawhchhuah alo tum ta zawk a ni. A him ber tih a hre si a.

A hla thu a tha em em a, a sa lartu Carrie Underwood-in a thiam bawk a , he hla ‘JESUS take the wheel’ tih hi keimah anga mawi lo ti ve em em tamtak an awm pawh hi alo mak lem love.