Hnehna chu kata a ni

A va hautak em!
He Indona hi do a va harsa em! Ka nun min tibuai thin a ni. Zing ka thova ka awm a nuamlo nghal a, thian ngaina hle e tilovin thian pawh ka kawm peih meuhlo. Ka hawina lam a piang hi a pik mup mai hian a hriat a tun hmaa kalo hlimpui thinte kha ka tan lawmna an chang zo tawh lo a ni. Khawvel mawi hi ka thlir hian hlimnain ka khat thei talo. Ka hmel te hi ava’n dang nasa tawh em! Tunhma chuan Lal hmel ang mai a hmel zahawm nei thin ka nih ve kha, ka mawina tizual tura ka’n inchei phei chuan thinlung a lawmin a a rukin a nui ver ver thin a ni. Tunah erawh chung hunte chuan hnutiang min chhawnin hmanlai an chang zo ta, kohkir leh theih ka nuam mange. Thimin min bawm a chhantu ka ngai a ni. Tuin nge min chhanchhuak thei ang le ?

Hnam len ka nuam mang e
Ka hmelma pa hi doral angin hmuh theih han niteh sela chuan aw... hnam (chem) sei leh hriam tak ka chhertir sauh sauh anga ka’n sat sawk sawk mai tur a nia tite in ka ngaihtuah thin. Anih loh leh puakrang silaiin kan tlir ang a vawikhat mah min rawn tibuai leh tawh miah lo turin ka’n kap anga. Ka buai thinna chu a reh duak mai awm si a. Mahse he ‘nun’ indona ah hian ka hmelma pa hi tisa anga hmutheih in a awm si lo.

Heihi ka han hrechhuak a
Singapore khawpui Indopui II naa a’n tlawm kha chu a luahtu British leh a thurualpui Allied Forces te tan kha chuan a hreawm duh khawp ang le. Sipai tha tamtak ral kutah an boral a an chan chuan maian chan pawh a tluk lo a nih kha.Singapore khawpui chu tanin lian takah a chang zo ta a ni. Mahse thinlunga tlawm ve ngailo General Douglas MacArthur-a, lehkha a an tlawmna thu ziaka thinlungah erawh tlawm chu sawiloh ‘Tunah hian hnehin ka awm a mahse lo ngai reng rawh u, kalo kir leh anga chumi hunah chuan hnehin ka awm tawh lovang, hnehtu ka ni tawh zawk ang’ a tih chher chher hnu kum reilo te ah hnehna a’n chang leh kha chu tun thleng hian zitirtu ropui tak niin ka hria a ni. Engtin ? Ele...indonaah ka’n tlawm a mahse hnehtu niin kan kir leh thei tih hi mawle.

Ka thovanga
Indona zawnga rapthlak ber ka nun hi hmachhawn harsa ka ti a ni. Lehlam lehlamah neksawrin ka awm a mahni chakna chuan kado hneh lo. Ka tlu a ka na em em a ni. Mahse beisei ka nei reng thin a chu ka beisei chu a rawnthlen theih nan tlumte a thlir takin kalo thlir thin a ni. Chu Ka beisei chuan thim chu rawn tikiangin engah min hruailut ngei ang tih ka ring nghet tlat a. Chutichuan ka beisei hlawhtlin nan he thil hi ka tita a, ka thovanga ka Pa hnenah ka kal dawn ani tiin ka rilru ka siam ta a ni. Tichuan ka thova ka Pa hnenah chuan ka kal ta ngei a thim chu a kiang a, tuifinriata lawng chhiatna tawk tuten an nghahhlelh em em khawvar chu kalo hmu leh ta a ni. Hnehin ka awm a mahse tunah chuan Krista zarah hnehtu ka ni ta.Ka tlawm a mahse ka tlawm hlen love, ka tlu a mahse Krista’n min kaitho leh ta.Hruaitu Krista ni suh sela chuan ka tlawm hlen ngei ang.

(Ka ringtu pui, nitina Indona hautak tak hmachhawn mekte’n hnehna an chan theih nan he thuziak hi ka hlan e)