Monday, July 29, 2013

NASA TAKA HNATHAWH


(Hei hi hunpuma rawngbawltu tan deuh bika ka ziah a ni a, mahse kan eizawnna theuhvah pawh kan inhmehbel theih ka ring.)

Hmanni deuha kan Synod Mission Board hnuaia building sakturte en a ka zin kual na atanga ka rilru a thil lo awm thar tak mai chu ‘Nasa taka hnathawh’ tih hi a ni a.

            Jengkha (Karbi Anglong Field) ah te, Badu leh Basirhat (Kolkata Field)-ah te kalin kan hotuten an Field chhunga an rawngbawlna chanchin te min hrilh a. Chu chuan min tiphurin keimahah phurna nasa tak min neih tir a, heng Field-a ringthar an neihtawhte ka hriatin a ropui ka ti hle a (Field dang pawh hei aia ringthar/Kohhran neih tamna zawk a awm ngei ang tih ka hria a, mahse tun tuma ka kalna hmun a nih avangin heng Field pahnihte hi a entirnan ka’n sawilang mai zawk a ni).Heng atanga ka rilrua thil lo awm chu keini rawngbawltute hian tihtakzet leh rim taka kan thawh chuan kan thawhrah Pathianin min pe zel dawn tih hi a ni.

            Kohhran hote kaltlanga ramthim ramrova kan rawngbawlna hi Pathianin kan eihmuhna atan min siamsak ve ah ka ngai a. ‘Thawklo chuan eipawh ei suhse’ tih Bible-a kan hmuh avangin eihmu (tawngdangin hlawhla) tlakin kan hna chanpual theuh hi kan thawk em? tih hi mahni theuh inzawt ta ila a chiang ber awm e.

            Tun hma deuh atangin Mizoram nitin chanchinbu-ah Sorkar hnathawk tamtak ten office an kal tlai thinzia te, office-ah pawh thawk mumal lova program dang dang-a an chhuahtam zia te, office-a an awm chhun pawh Biak an har thin zia te leh a bik takin thingtlang atanga rawn dawrturte pawh beidawnga tamtak an awm thin thute kan hmu thin a ni. A awmzia chu hetiang mite hi Sorkar leh mipui te tana pawh a chhenfakawm an nilova, chumai nilovin an eizawnna hnaah an taimak tawkloh avangin hlawh la tlak an nilo tih na a ni. 

            Nikum lawk khan Silchar-ah Sound System lei turin dawr pakhatah kan kal a, kan kal hunlai kha Puja tura an inbuatsaih hunlai a ni bawk a, customer dang kha an nei nual a. A dawr neitute khan min ngaihsaktha loin rei tak kan nghak a, midang leitur sound box an test te kha a ri a ringin a bengchheng si a. Keita pek chuan ka tuarthei tawh ngang lo a niang a nei tute hnenah chuan ka va ang ta alawm le. ‘Enga tinge darkar chuang min nghahtir, in customer te min ngaihsak lo lutuk’ tiin ka va hrilh a. Dawr neitupa chuan an awmna hmun chu Silchar (vairam) a ni a, Mizoram ang a nihloh zia thuin min chhang a, vairamah chuan hetiang hian an tihthin thu leh Sorkar office leh Bank etc. ah pawh a hun taka engmah an tih ngailoh zia in min chhang a ni. 

            Mahse ka rilru-ah chuan hepa thusawi hi vairamah pawh an apply vek tawhlo tih ka hria a ni (amah chu ka hrilh tawh chuanglo a). Hetih lai hian Silchar-ah Big Bazaar an hawng tep tawh a, Vishal pawh a awm tawh a ni. Heng Super market ho hi an han hawng anga, a dawr tuturte min ngaihsak zia leh kan leiduhlo chung pawh minleitir tum a ninawm khawp a min zui thin zia ka hre vek a ni. Bank-ah pawh Bank thar, customer te ngaihsak leh kan mobile-a min rawn phone zut zut thin te thlengin anlo awm ta bawk. Hemi ina a entir chu a tamthei ang ber mite hnena inzawrh a, inhralh a, an sumdawnna alo hlawk hi a ni. 

            Keini pawhin mite hnena Lal Isua kan zawrhna (advertise) naah hian hralh thei tur khawpin kan thawhrimpui em? Kan advertisement siam te hi a hlui tawh a, mite tana enninawm a nih tawh chuan a tharin thlak te pawh a ngai maithei e. Tunhmaa fakna lar tak ‘Lifebouy’ fakna te kha tunah chuan a tharin an thlak a, ‘what an idea sirji’ fakna pawh hmuh tur a awm tawh lo. Ngaihtuahna thar, mite duhzawng ang zel a Lal Isua chanchin hrilh a, chumi atana kan rilru leh ngaihtuahna nasa tak kan sen reng hi a va tul em! Chutih lai chuan a thing herlum a ngaih hun te pawh a awm maithei bawk e.

            Engpawh nise, keini rawngbawltu te hian kan eihmuhna atana Pathianin Kohhran hote kaltlanga min siamsak ‘Chanchintha puandarh hna’ kan thawhna ah hian eng ang taka rim leh nasa in nge kan thawh aw… min mamawh tute tan ‘24x7 available’ kan ni ve em?
                                        ‘Thawhrim chu chawlhna nuam a ni’

2 comments:

  1. Fuihna tha tak a ni.
    2nd last para a i sawi;"Lal Isua kan zawrhna hian harlh thei tur khawpin kan thawhrimpui em, TV-a fakna te nena i rawn sawifiah hi a tha ka ti khawp mai.

    ReplyDelete
  2. Kan theihtawp hian thawk ila, abak chu Pathianin min pe mai dawn a ni. 'God help who help themselves' tih a nih kha.

    ReplyDelete